“Muzyurak 4” multfilmining premyerasi kechiktirildi!

Disney Animation rahbari Jared Bush Collider nashriga bergan intervyusida “Muzyurak 4” multfilmi rejalashtirilganidan kechroq namoyish etilishini ma’lum qildi.

Dastlab “Muzyurak 3” va “Muzyurak 4” qismlarini ketma-ket yillarda chiqarish rejalashtirilgan edi. Biroq ijodkorlar uchinchi qismni imkon qadar mukammal yaratish va tomoshabinlarga to‘laqonli hikoya taqdim etish maqsadida rejani o‘zgartirgan.

Ma’lumot uchun, “Muzyurak” — 2013-yilda Disney tomonidan yaratilgan musiqiy-fentezi janridagi 3D animatsion film. Multfilm daniyalik yozuvchi Hans Kristian Andersenning “Qor malikasi” ertagi asosida ishlangan bo‘lib, Disney studiyasining 53-to‘liq metrajli animatsion filmi hisoblanadi.

“Muzyurak 3” premyerasi 2027-yil 24-noyabrga rejalashtirilgan. To‘rtinchi qismning chiqish sanasi esa hozircha noma’lum.