Yaponiyadagi yirik yong‘inda 170 ta uy yonib ketdi

Yaponiyaning Oita shahrida katta yong‘in sodir bo‘lib, 170 dan ortiq uy vayron bo‘ldi, bir kishi halok bo‘ldi. Yong‘in Saganoseki tumanida 18-noyabr kechqurun boshlangan va kuchli shamol sabab tez tarqalgan. Alanga 48 900 kvadrat metr (yettita futbol maydoniga teng) maydonni qamrab olgan. O‘t o‘chiruvchilar va harbiy vertolyotlar yong‘inni o‘chirishga jalb etilgan. 175 nafar aholi evakuatsiya qilingan, 300 ga yaqin uy elektrsiz qolgan. Bir kishi o‘lik holda topilgan, yana bir ayol yengil kuyish bilan shifoxonaga yotqizilgan. Yong‘in sababi o‘rganilmoqda. Mutaxassislarning aytishicha, bu 1976-yildan beri Yaponiyadagi eng yirik shahar yong‘ini hisoblanadi.