Surxondaryoda tosh ko‘chishi oqibatida, avtomobil yo‘li yopilib qoldi

Joriy yilning 24-oktabr kuni Surxondaryo viloyatining Uzun tumanida tog‘ jinslari ko‘chib, avtomobil yo‘lini to‘sib qo‘ydi. Viloyat hokimligi ma’lumotiga ko‘ra, hodisa soat 03:30 atrofida 75V040 avtomobil yo‘lining 21–22-kilometrlari oralig‘ida sodir bo‘lgan.

Voqea joyiga Favqulodda vaziyatlar bo‘limi xodimlari, yo‘l ishchilari va maxsus texnikalar jalb etilib, tezkor choralar ko‘rilgan. Natijada soat 07:30 ga qadar yo‘l tog‘ jinslaridan to‘liq tozalanib, transport harakati tiklangan. Hodisa oqibatida esa jabrlanganlar qayd etilmagan.

Mas’ullar haydovchilarni tog‘li hududlarda harakatlanishda ehtiyotkor bo‘lishga chaqirdi.