Qozog'iston prezidenti maxsus operatsiya qo'shinlari ishtirokidagi harbiy mashg'ulotlarga tashrif buyurdi

Qozog‘iston Qurolli Kuchlari har qanday chaqiriqlarga tayyor turishi kerak, dedi To'qayev harbiy mashg'ulotlar davomida.

Qozog'iston prezidenti Qosim-Jomart To'qayev Olmaota viloyatiga ish safari chog'ida Maxsus operatsiyalar va havo hujumi qo'shinlari ishtirokidagi harbiy mashg'ulotlarda qatnashdi. Bu haqda Qozog'iston rahbari matbuot xizmati xabar berdi.

“Bereg poligonida Qozogʻiston Respublikasi Prezidenti, Qurolli Kuchlar Oliy Bosh Qo'mondoni Qosim-Jomart To'qayev boshchiligida “Batyl Toytaris-2023” strategik qo'mondonlik-shtab harbiy mashg'ulotlari bo'lib o'tdi. Qosim-Jomart To'qayev mashg'ulotlarni kuzatish minorasidan turib kuzatdi”, — deyiladi xabarda.

Mashg'ulotlar boshlanishidan oldin general-mayorlar Bolat Jo'raboyev va Almaz Jumakeyev davlat rahbariga maxsus operatsiya kuchlari va havo hujumi kuchlaridan mudofaa amaliyotida foydalanish to'g'risida hisbot berdi.

"Havo hujumi kuchlarining brigada taktik guruhlari aviatsiya ko'magida, shuningdek, quruqlikdagi qo‘shinlar va maxsus operatsiya qo‘shinlari bo'linmalari bilan hamkorlikda suv to'sig'ini yengib o'tib, qarama-qarshi qirg'oqda belgilangan dushman chizig'ini egallab olish bo'yicha taktik harakatlar ishlab chiqdi. Maxsus operatsiyalar kuchlari va Milliy gvardiya bo'linmalari soxta dushman tomonidan qo'lga olingan Qapchag‘ay GESini ozod qildi”, — deyiladi matbuot xizmati xabarida.

Mashg'ulotlar davomida prezident murakkab geosiyosiy vaziyatda bunday harbiy amaliyotlarni o‘tkazish muhimligini ta’kidladi.

"Bugun jahon mudofaa tizimida keng ko‘lamli o‘zgarishlar ro‘y bermoqda. Urushning zamonaviy usullari va gibrid turlari keng tarqalmoqda. Hujumlar nafaqat harbiy, balki axborot, psixologik, siyosiy, iqtisodiy bo'lishi ham mumkin. Shuning uchun Qozog‘iston Qurolli Kuchlari har qanday chaqiriqlarga tayyor turishi kerak", dedi To'qayev.

Shuningdek, favqulodda vaziyatlar vazirligi kuchlari tomonidan sodir bo‘lishi mumkin bo‘lgan texnogen ofat oqibatlarini bartaraf etish, aholiga gumanitar yordam ko‘rsatish bo‘yicha chora-tadbirlar ishlab chiqildi. Bundan tashqari, mashg‘ulotlar o‘tkaziladigan hududlarda qo‘shinlarni strategik qayta guruhlash amalga oshirildi.

“Dengiz kuchlari aviatsiya va maxsus operatsiya qo'shinlari ko'magida Kaspiy dengizi suvlaridagi iqtisodiy obyektlar xavfsizligini taʼminladi. Tegishli qo‘shma jangovar tayyorgarlik vazifalari Olmaota, Qarag'anda, Shimoliy Qozog'iston, Abay viloyatlari poligonlarida o‘tkazildi”, — deyiladi matbuot xizmati xabarida.