O‘zbekiston–Qirg‘iziston–Xitoy temiryo‘li qurilishi 5–7 mlrd dollarga tushishi mumkin

Hozirda uchta davlat birlamchi texnik-iqtisodiy asoslari tayyor bo‘lgan loyihani kim, qanday moliyalashtirishi masalasini ko‘rib chiqyapti. Transafg‘on temiryo‘li loyihasi esa dastlabki texnik topshiriqni ishlab chiqish bosqichida qolmoqda.

13 sentabr kuni Toshkentda “Xalqaro avtomobil transporti: barqaror rivojlanish va farovonlik sari” nomli xalqaro konferensiya bo‘lib o‘tdi. Unda 11 ta xalqaro tashkilot, 29 ta mamlakatdan 93 nafar delegatsiya vakillari ishtirok etishdi. Unda xalqaro yuk tashuvlarida yuzaga kelayotgan muammolar, logistika masalalari muhokama qilindi.

Tadbir doirasida Transport vazirligi departament rahbari Abdusamad Mo‘minovning jurnalistlar savoliga javoban aytishicha, hozirda O‘zbekiston–Qirg‘iziston–Xitoy temiryo‘li loyihasini amalga oshirish uchun pul topish harakati ketyapti.

“Bugungi kunda tashqi savdoni rivojlantirish, O‘zbekistonning eksport, import yuklarini tashqi dunyoga olib chiqish uchun 6-7 ta marshrutlarimiz bor. Qo‘shimcha ravishda alternativ variant sifatida bizda Xitoy–Qirg‘iziston–O‘zbekiston multimodal koridoridan foydalanilmoqda.

May oyida prezidentning Tsian shahriga tashrifi chog‘ida kelishuvlar bo‘ldi. Shunda O‘zbekiston–Qirg‘iziston–Xitoy temiryo‘li qurilishi bo‘yicha dastlabki texnik-iqtisodiy asos tayyorlandi. Hozirgi kunda ushbu loyiha uchun pul topish harakati ketyapti. Hamda bu loyihani boshqarish shartlari kelishilyapti”, – dedi Abdusamad Mo‘minov.

Manba: Kun.uz