Nepalda kuchli yomg‘ir va ko‘chki oqibatida 24 kishi halok bo‘ldi

Nepalda bir necha kun davom etgan kuchli yomg‘ir oqibatida suv toshqinlari va ko‘chkilar yuz berdi. Tabiiy ofatlar oqibatida 24 kishi halok bo‘lgan, 14 kishi bedarak yo‘qolgan. Ko‘chkilar va daryolarning toshishi oqibatida uylar, yo‘llar va ko‘priklar vayron bo‘lgan. Tog‘li hududlarda o‘ndan ortiq qishloq butunlay vayron bo‘ldi, ularning ba’zilari alpinistlar uchun baza vazifasini o‘tagan. Jabrlangan hududlardan 2 mingdan ortiq kishi evakuatsiya qilindi.
Ijtimoiy tarmoqlarda tarqalgan kadrlarda tog‘ning katta qismi bir necha soniya ichida qulab, Kali Gandaki daryosiga tushgani aks etgan. Janubdagi ayrim hududlarda ham suv to‘planishi va tuproq eroziyasi kuzatilgan. Qurbonlar soni ortishi mumkin.