Tailandda “junli kruassan” uchun odamlar soatlab navbat kutmoqda

Tailandning Pattaya shahridagi novvoyxona o‘zining noodatiy “junli kruassan”lari bilan ko‘pchilikda katta qiziqish uyg‘otmoqda. Sababi, kruassanning ustidagi qora tolalar odamlarga jun yoki soch tolasini eslatadi. Biroq, bu tolalar mutlaqo iste’mol qilish mumkin bo‘lgan mahsulot bo‘lib, Osiyo oshxonasida keng qo‘llaniladigan fat choy deb ataluvchi qora dengiz o‘tlaridan tayyorlanadi. Novvoyxona oshpazining aytishicha, dengiz o‘tining biroz sho‘r ta’mi kruassan ichidagi shirin krem bilan uyg‘unlashib, o‘ziga xos ta’m hosil qiladi. Aslida ushbu g‘oya bir mijozning do‘stiga hazil tariqasida “junli tort” tayyorlab berishni so‘raganidan keyin paydo bo‘lgan. Tort ijtimoiy tarmoqlarda virusdek tarqalganidan keyin novvoyxona mazkur g‘oyani kruassanga ham tatbiq etgan.