Prezident Mintaqaviy ekologik sammit koʻrgazmasi bilan tanishdi

Shavkat Mirziyoyev Qozogʻistonga amaliy tashrifi doirasida Ostona shahridagi Astana EXPO International Exhibition Centerda tashkil etilgan Mintaqaviy ekologik sammit (MES–2026) koʻrgazmasidagi milliy pavilyonlar bilan tanishdi. Koʻrgazmada Markaziy Osiyo mamlakatlari, jumladan, Moʻgʻuliston, Ozarbayjon, Gruziya va Armaniston delegatsiyalari rahbarlari ishtirok etdi. Sammit doirasida iqlim oʻzgarishiga qarshi kurashish, oziq-ovqat xavfsizligini taʼminlash, tabiiy resurslarni barqaror boshqarish, havo ifloslanishini kamaytirish, chiqindilarni samarali boshqarish hamda “yashil” iqtisodiyotga oʻtish masalalari muhokama qilindi. Oʻzbekiston pavilyonida ekologiya va iqlim siyosati yoʻnalishidagi ustuvor tashabbuslar, jumladan, “Yashil makon”, “Toza havo”, “Chiqindisiz hudud”, “Ekomadaniyat”, “Biomeros” va “Ekologik taʼlim” loyihalari taqdim etildi. Shuningdek, Orolboʻyi hududidagi ekologik muammolarni bartaraf etish va xalqaro tashkilotlar, xususan United Nations tuzilmalari bilan hamkorlik masalalariga alohida eʼtibor qaratildi.