90 yoshli ayolga zulm qilgan xizmatchi sudlandi

Toshkent shahrining Mirzo Ulug‘bek tumanida 90 yoshli ayolni bir necha oy davomida muntazam ravishda kaltaklab kelgan parvarishchi ayolga nisbatan sud hukmi o‘qildi. Ma’lum bo‘lishicha, xizmatchi 2025-yil oktyabr oyida ishga olingan. Ayol hojatxonada kuzatuv kameralari yo‘q deb o‘ylagan va jabrlanuvchining gapira olmasligidan foydalanib, uni muntazam ravishda kaltaklab kelgan. Zo‘ravonlik holatlari 2026-yil 19-mart kuni oila a’zolari buvining g‘ayrioddiy xatti-harakatlaridan shubhalanib, yashirin kuzatuv kameralaridagi videoyozuvlarni tekshirganidan so‘ng, fosh bo‘lgan. Sud-tibbiy ekspertizasi jabrlanuvchining bosh yumshoq to‘qimalari lat yeganini, bir ko‘ziga qon quyilganini, shuningdek, yuzi hamda qo‘l-oyoqlarida ko‘plab ko‘karishlar borligini aniqlagan.

Sud majlisida ayblanuvchi aybiga to‘liq iqror bo‘lib, o‘z harakatlarini charchoq bilan izohlagan. Ayol Jinoyat kodeksining 110-moddasi bilan aybdor deb topilib, 4 yil muddatga ozodlikdan mahrum qilindi.