O‘zbekistonda 2028-yildan pensiya yoshi oshirilishi mumkin

O‘zbekistonda pensiya tizimini takomillashtirish bo‘yicha yangi o‘zgarishlar taklif qilindi. Iqtisodiyot va moliya vazirligi tegishli qaror loyihasini jamoatchilik muhokamasiga qo‘ydi.
Loyihaga ko‘ra, 2028-yildan pensiya yoshi har yili 3 oyga oshirib boriladi. Natijada 2039-yilga kelib pensiya yoshi erkaklar uchun 63 yosh, ayollar uchun 58 yosh bo‘lishi rejalashtirilmoqda.
Shuningdek, 2027-yildan pensiya hisoblashda olinadigan ish haqi davri bosqichma-bosqich 5 yildan 20 yilgacha oshiriladi. Eng past daromadli davrning 10 foizi hisob-kitobdan chiqariladi.
Yoshga doir pensiya uchun talab qilinadigan 7 yillik ish staji ham bosqichma-bosqich oshirilib, 2034-yilda 15 yilga yetkaziladi.
Bundan tashqari, pensiyaga kechroq chiqadigan va yuqori ijtimoiy soliq to‘laydigan fuqarolar uchun pensiya hisoblashda ish haqining yuqori chegarasi oshiriladi.
2027-yildan ayrim fuqarolarning jamg‘arib boriladigan pensiya hisobvarag‘iga ixtiyoriy badallariga davlat tomonidan qo‘shimcha mablag‘ ajratish taklif qilinmoqda.
2030-yildan esa jamg‘arib boriladigan pensiya mablag‘laridan og‘ir kasallikni davolash va ipoteka krediti uchun boshlang‘ich to‘lov sifatida foydalanish imkoniyati berilishi rejalashtirilmoqda.
Takliflar hozircha qaror loyihasi hisoblanadi.