Sudanda dahshatli qirg‘in

Sudanda 2023-yildan beri davom etayotgan qonli fuqarolik urushi 2025-yil oktabr oyida yangi, yanada dahshatli bosqichga o‘tdi. Tezkor harakat kuchlari (RSF) deb ataluvchi qurolli guruh Shimoliy Darfurdagi Al-Fashir shahrini egallab, ommaviy qirg‘in uyushtirdi.

Mahalliy manbalarga ko‘ra, shahar markazidagi kasalxonaga uyushtirilgan hujumda kamida 460 kishi, jumladan bemorlar, bolalar va tibbiyot xodimlari halok bo‘lgan. Hujumdan so‘ng ijtimoiy tarmoqlarda tarqalgan videolarda vayron bo‘lgan binolar, yonib ketgan mashinalar va qurbonlarning dahshatli tasvirlari aks etgan.

28-oktabr kuni e’lon qilingan bayonotda inson huquqlari tashkilotlari RSF jangarilarini so‘nggi kunlarda 2000 dan ortiq qurolsiz tinch aholiga nisbatan qatl amalga oshirganlikda aybladi.

BMT Bosh kotibi bu voqeani “jiddiy inson huquqlari inqirozi” deb atadi va tomonlarni zudlik bilan tinchlik muzokaralariga qaytishga, shuningdek, insonparvarlik yordamlarini hududga kiritishga chaqirdi.