O‘zbekiston va Qozog‘istonda yirik loyihalar boshlandi

Qozog‘iston prezidenti Qosim-Jo‘mart To‘qayev davlat tashrifi bilan O‘zbekistonda bo‘lib turibdi. Toshkentda u Prezident Shavkat Mirziyoyev bilan tor doiradagi muzokaralar o‘tkazdi, so‘ngra Oliy davlatlararo kengashning ikkinchi yig‘ilishida qatnashdi. Tadbirlar davomida “Markaziy Osiyo” Xalqaro sanoat kooperatsiyasi markazi, Tenge Bank’ning Toshkentdagi yangi bosh ofisi va Silkway Central Asia logistika markazi ishga tushirildi. Shu bilan birga, Yangi Toshkentda “Ostona” mavzesi va poytaxtlarda “Toshkent” hamda “Ostona” mehmonxona majmualari qurilishi boshlandi. Tomonlar ikki mamlakat o‘rtasidagi savdo-iqtisodiy hamkorlikni kengaytirish va 2026-yilda Qozog‘istonda birinchi Kengash yig‘ilishini o‘tkazishga kelishib oldi.
Shuningdek, Prezident Shavkat Mirziyoyev Qozog‘iston prezidentiga O‘zbekistonning eng yuqori davlat mukofoti — “Oliy Darajali Do‘stlik” ordenini topshirdi.