Botir Qudratxo‘jayev O‘zbekiston mudofaa vaziri etib tayinlandi

Botir Bahromovich Qudratxo‘jayev O‘zbekiston mudofaa vaziri etib tayinlandi. Bu haqda prezidentning tegishli farmoni imzolandi.

Shuhrat Xolmuhammedov boshqa ishga o‘tishi munosabati bilan mudofaa vaziri lavozimidan ozod etildi. U ushbu lavozimga 2024-yil noyabrida tayinlangan, bungacha esa mudofaa vazirining birinchi o‘rinbosari — Qurolli Kuchlar Bosh shtabi boshlig‘i bo‘lib ishlagan.

Botir Qudratxo‘jayev mehnat faoliyatini 1997-yilda O‘zbekiston harbiy prokuraturasida boshlagan. Keyinchalik Farg‘ona viloyati harbiy prokuraturasida tergovchi-kriminalist, Toshkent harbiy okrugida katta tergovchi va Toshkent viloyati harbiy prokurori lavozimlarida ishlagan.

2022-yil noyabrida u bosh prokuror o‘rinbosari — O‘zbekiston harbiy prokurori etib tayinlangan. 2025-yil fevralida esa favqulodda vaziyatlar vaziri lavozimini egallagan va unga general-mayor harbiy unvoni berilgan. U 2026-yil yanvarida ushbu lavozimdan ozod etilgan.