Zelenskiyning Oq uyga tashrifi: Nimalar muhokama qilindi?

Ukraina prezidenti Vladimir Zelenskiy 18-avgust kuni Vashingtonda AQSH prezidenti Donald Tramp va Yevropa yetakchilari bilan uchrashuvlar o‘tkazdi. Muzokaralar Ukraina uchun xavfsizlik kafolatlari, tinchlik kelishuvi va harbiy yordam masalalariga bag‘ishlandi.
Zelenskiy Tramp bilan uchrashuvdan oldin Finlyandiya, Buyuk Britaniya, Italiya rahbarlari, NATO bosh kotibi va Yevrokomissiya rahbari bilan pozitsiyalarni muvofiqlashtirdi. U hududiy masalalarni Rossiya prezidenti Vladimir Putin bilan bevosita va hech qanday shartsiz muhokama qilishga tayyorligini bildirdi.
Shuningdek, Zelenskiy AQSHga 90 mlrd dollarlik qurol-yarog‘ paketi taklif qilinganini tasdiqladi. Uning so‘zlariga ko‘ra, 30 mamlakatdan iborat “ko‘ngillilar koalitsiyasi” tuzilishi mumkin.

Uchrashuvning eng kutilmagan voqeasi — Trampning muzokara vaqtida Vladimir Putinga telefon qilgani bo‘ldi. Bu qadam Yevropa delegatsiyalarini hayratda qoldirdi, biroq ular uni “ijobiy signal” sifatida baholadi. Putin bilan suhbatdan so‘ng Tramp Zelenskiy va Putin o‘rtasida yuzma-yuz uchrashuv bo‘lishi mumkinligini ma’lum qildi.
Shu bilan birga, Tramp uchrashuvni “juda samarali” deb baholab, Yevropa davlatlari bilan kelishilgan holda Ukrainaga xavfsizlik kafolatlari taqdim etilishini qayd etdi.