Navoiyda kichik samolyotlar ishlab chiqariladi

“Navoiy” EIZ direksiyasi hamda Rossiyaning “Pervoye opytno-konstruktorskoye byuro” kompaniyasi o‘rtasida uchuvchisiz samolyot tipidagi uchish apparatlarini ishlab chiqarish bo‘yicha memorandum imzolandi. Loyiha qiymati — 30 million dollar. Loyiha doirasida “Navoiy” EIZda kelgusi 3 yilda 100 ta samolyot ishlab chiqarish rejalashtirilgan. Ilk samolyot 2025-yil oktabr oyida taqdim etiladi. Ishlab chiqarilgan samolyotlar ichki bozordan tashqari xorijga ham eksport qilinishi rejalashtirilgan. 

“Pervoye opytno-konstruktorskoye byuro” kompaniyasi tomonidan ishlab chiqariladigan SP-30 yengil, 2 o‘rinli samolyotlari asosan qishloq xo‘jaligi, o‘quv va sayyohlik parvozlari uchun mo‘ljallangan. Bunday turdagi samolyotlar 100 ot kuchiga ega bo‘lib, tezligi 150 km/soatgacha yetadi.