Toshkentda erkak suvga tushib ketgan qizlarni qutqaraman deb o‘zi halok bo‘ldi

5-may kuni Toshkentning Yakkasaroy tumanidagi “Rakat” mahallasida joylashgan Bo‘rijar kanalida fojeali hodisa sodir bo‘ldi. Yettidan sakkiz yoshgacha bo‘lgan uch qizaloq qirg‘oqda o‘ynab yurgan. Ulardan biri sirpanib, kanalga tushib ketgan. Do‘stini qutqarishga uringan ikkinchi qiz ham suvga sakragan, ammo kuchli oqim uni pastga oqizib ketgan.
Qizlarning qichqirig‘ini eshitgan odamlar yordamga yugurishgan. Mahalliy ayollardan biri xoda yordamida birinchi qizni qutqarib olgan. Quyi oqimga oqib ketayotgan ikkinchi qizni esa yaqin atrofda bo‘lgan 43 yoshli erkak qutqargan. Biroq o‘zi kuchli oqim sababli cho‘kib halok bo‘lgan. Uning jasadi hodisa sodir bo‘lgan joydan 4 kilometr pastdan topilgan.
Voqea yuzasidan tergovga qadar tekshiruv boshlagan. Fojia sodir bo‘lgan hududda kanal bo‘ylarining betonlashtirilgani va xavfsizlik choralarining yetarli emasligi aytilgan.