Temir yo‘l vokzallariga pasportsiz kirishga ruxsat berildi

Mazkur tartib yuzasidan Transport vazirligi rasmiy izoh berdi. Vazirlar Mahkamasining tegishli qaroriga muvofiq, fuqarolarga temir yo‘l vokzallariga shaxsni tasdiqlovchi xujjatlarsiz kirishlariga ruhsat beriladi. Bu haqda Transport vazirligi Matbuot xizmati xabar berdi.
Unga ko‘ra, temir yo‘l vokzallariga tashrif buyuruvchilar endilikda soddalashtirilgan holda ya’ni shaxsni tasdiqlovchi hujjatsiz vokzal hududiga kirishlari mumkin.
Qayd etilishicha, yo‘lovchilar platformasiga-perronga yo‘lovchi poyezd chiptalariga ega bo‘lgan yo‘lovchilar hamda harakatlanishi cheklangan bemor yoki keksa yoshdagi yo‘lovchilarni kuzatuvchi va kutib oluvchi fuqarolar shaxsni tasdiqlovchi hujjat bilan o‘tishlari mumkin.
"Chiptalari yo‘q shaxslar, shuningdek, chiptada ko‘rsatilgan ma’lumotlar yo‘lovchining shaxsini tasdiqlaydigan hujjatlardagi ma’lumotlarga mos bo‘lmagan fuqarolarning yo‘lovchilar platformasi-perronga va yo‘lovchi tashish vagonlariga kirishiga yo‘l qo‘yilmaydi",- deyiladi xabarda.

Manba: uznews.uz