Isroil Guterrishning iste’fosini talab qilib, BMT xodimlariga endi viza berilmasligini ma’lum qildi

BMT bosh kotibi Antoniu Guterrish Xavfsizlik kengashining 24 oktyabr kungi yig‘ilishida Yaqin Sharqdagi vaziyat borgan sari og‘irlashib borayotganini aytib, barcha tomonlarni tinch aholini hurmat va himoya qilishga chaqirdi.

“Men HAMAS tomonidan 7 oktyabr kuni Isroilda sodir etilgan dahshatli va misli ko‘rilmagan terroristik harakatlarni so‘zsiz qoraladim. Oldindan maqsad qilingan qotilliklar, jarohat yetkazishlar va tinch aholini garovga olishni, shuningdek, fuqarolik obektlarini nishonga olishni hech narsa bilan oqlab bo‘lmaydi”, – dedi BMT rahbari.

Shu bilan birga, u HAMASning hujumlari “yo‘q joydan paydo bo‘lib qolmagani”ni ta’kidladi.

“HAMASning hujumlari yo‘q joydan paydo bo‘lib qolmaganini tan olish muhim ahamiyatga ega. Falastin xalqi 56 yildirki siqib chiqaruvchi bosqinchilikka duchor bo‘lyapti. Ularning yerlari ularning ko‘z oldida doimiy ravishda aholi punktlari qurish orqali yutib yuborilyapti, zo‘ravonliklar bo‘lyapti. Ularning iqtisodiyoti bo‘g‘ib qo‘yildi, xalqi ko‘chirib yuborildi, uylari esa buzib tashlandi. Ayanchli ahvolni siyosiy yo‘l bilan hal qilishga bo‘lgan umidlari esa puchga chiqyapti.

Lekin HAMASning dahshatli hujumlarini Falastin xalqining chekkan ozorlari bilan oqlab bo‘lmaydi. O‘z navbatida, Falastin xalqining ommaviy jazolanayotganini ham bu dahshatli hujumlar bilan oqlab bo‘lmaydi”, – dedi Guterrish.

Falastin xalqi 56 yildirki siqib chiqaruvchi bosqinchilikka duchor bo‘lyapti, deb bayonot berdi BMT bosh kotibi. “Ularning yerlari aholi punktlari qurish orqali yutib yuborilyapti, iqtisodiyoti bo‘g‘ib qo‘yildi, xalqi ko‘chirib yuborildi, uylari esa buzib tashlandi”, dedi Guterrish. Bunga javoban Isroil rasmiylari uning iste’fosini talab qilib, BMT xodimlariga endi viza berilmasligini ma’lum qildi.

Manba: kun.uz