Indonezyada 200 dan ortiq bola o‘limiga sabab bo‘lgan sirop ishlab chiqaruvchilar qamoqqa olindi

Indoneziyada yo‘tal siropi ishlab chiqaruvchi Afi Farma firmasi boshlig‘i 200 dan ortiq bolalar o‘limidan keyin qamoqqa olindi. Bu haqda BBC xabar berdi.
Afi Farma firmasi ortiqcha miqdorda zaharli moddalar bo‘lgan yo‘tal siroplarini ishlab chiqarishda ayblangan.
Firmaning boshlig‘i va yana uch nafar amaldori ikki yillik qamoq jazosiga hukm qilindi va 1 milliard Indoneziya rupiyasi (63 056 dollar; 51 786 funt sterling) miqdorida jarimaga tortildi.
Kompaniya advokati, ular beparvolikni rad etishlarini va firma apellyatsiya berish yoki bermaslikni ko‘rib chiqayotganini aytdi.
Prokurorlar Afi Farma bosh direktori Arief Prasetya Xaraxapni to‘qqiz yilgacha, qolgan ayblanuvchilarni esa yetti yildan qamoq jazosiga hukm qilishni so‘ragan edi.
Prokurorning taʼkidlashicha, 2021-yil oktabridan 2022-yil fevraliga qadar kompaniya yoʻtalga qarshi sirop tayyorlash uchun ishlatiladigan propilen glikolning ikki partiyasini olgan.
Bu partiyalarda 96% dan 99% gacha etilen glikol bor edi, dedi prokuror. Ikkala modda ham erituvchilarga qo‘shimcha sifatida ishlatilishi mumkin. Propilen glikol toksik bo‘lmagan va dori-darmonlar, kosmetika va oziq-ovqatda keng qo‘llaniladigan bo‘lsa-da, etilen glikol zaharli bo‘lib, bo‘yoq, qalam va tormoz suyuqligida ishlatiladi.
Prokurorlarning ta’kidlashicha, kompaniya yo‘tal siropida ishlatiladigan ingredientlarni sinovdan o‘tkazmagan va buning o‘rniga etkazib beruvchining sifat va xavfsizlik sertifikatlariga tayangan.
Afi Farmaning advokati Samsul Hidoyatning BBCga aytishicha, Indoneziyaning dori vositalarini tartibga soluvchi organi dori ishlab chiqaruvchilardan ingredientlarni qattiq sinovdan o‘tkazishni talab qilmagan.
Sharqiy Yavaning Kediri tuman sudi sudyasi to‘rt nafar ayblanuvchini xavfsizlik standartlariga javob bermaydigan farmatsevtika mahsulotlarini qasddan ishlab chiqarishda aybdor deb topdi.
Bu holat butun dunyo bo‘ylab zaharlanishdan keyin dori ta’minoti zanjirlari ustidan nazoratni kuchaytirishga qaratilgan sa’y-harakatlar kuchaygan bir paytda yuz berdi.
2022-yildan beri 200 dan ortiq indoneziyalik bolalar, ularning aksariyati besh yoshga to‘lmagan, ifloslangan yo‘tal siropi bilan bog‘liq o‘tkir buyrak jarohati tufayli vafot etdi. Gambiya va O‘zbekistonda 100 ga yaqin o‘lim qayd etilgan.
Jahon sog‘liqni saqlash tashkiloti (JSST) Hindiston va Indoneziyada ishlab chiqarilgan oltita yo‘tal siropi haqida ogohlantirdi.