Konditsionersiz uyni qanday salqin saqlash mumkin? Mutaxassislar oddiy usulni tavsiya qildi

Yozning jazirama kunlarida konditsionersiz ham uyni salqin saqlash mumkin. Mutaxassislar buning uchun ertalabki salqin havoni xonada imkon qadar uzoqroq ushlab turishni tavsiya etmoqda.

Buning uchun ertalab soat 8–9 gacha derazalarni ochib shamollatish, havo isiy boshlagach esa derazalarni mahkam yopib, jalyuzi yoki pardalarni tortish kerak. Bu quyosh nurlarining xonaga kirishini cheklab, ichkaridagi salqin havoni uzoqroq saqlashga yordam beradi. Shuningdek, ventilyator oldiga muz solingan idish qo‘yish yoki ochiq derazaga ho‘l choyshab osish ham xona haroratini biroz pasaytirishi mumkin.

Mutaxassislar bu usullar konditsioner o‘rnini to‘liq bosa olmasligini, ammo uyni to‘g‘ri shamollatish va qorong‘ilashtirish bilan birga qo‘llansa, jazirama issiqda sezilarli darajada qulaylik yaratishini ta’kidlamoqda. Eng muhimi, uyni faqat tashqaridagi havo ichkaridagidan salqinroq bo‘lgandagina shamollatish tavsiya etiladi.