O‘zbekistonlik bloger Qozog‘istonda xalqaro qidiruvga berildi

Qozog‘iston o‘zbekistonlik bloger Mahmud Hikmatovni xalqaro qidiruvga e’lon qildi. U ijtimoiy tarmoqlarda “Maxa.dxb” nomi bilan tanilgan. 2000-yilda tug‘ilgan Hikmatov noqonuniy internet-kazinolarni reklama qilishda gumon qilinmoqda. Tergov ma’lumotlariga ko‘ra, u Qozog‘istondagi qimor platformalarini targ‘ib qilish uchun blogerlarni jalb etgan.

Qozog‘iston Moliyaviy monitoring agentligi ma’lumotlariga ko‘ra, Hikmatov 35 dan ortiq blogerni noqonuniy reklama sxemasiga jalb qilgan. U blogerlarning auditoriyasi, obunachilar geografiyasi va reklama narxlari haqida ma’lumot to‘plagan. Hikmatovga nisbatan qamoqqa olish ehtiyot chorasi tanlangan. Qozog‘iston tomoni uning qayerdaligi haqida ma’lumot bergan shaxsga mukofot va anonimlik va’da qilgan.