YPX xodimlari og‘ir ahvolga tushgan oilaga yordam berdi

O‘zbekistonda YPX xodimlari og‘ir ahvolga tushgan oilaga tezkor yordam ko‘rsatdi. Yiqilib tushgan kichkina qizchaning og‘zidan qon ketishi boshlanganidan so‘ng, otasi uni zudlik bilan shifoxonaga olib ketayotgan edi.

Yo‘lda YPX patrulini ko‘rgan ota yordam so‘radi. Inspektorlar darhol maxsus chiroq va sirenalarni yoqib, avtomobilni 16-sonli shahar shifoxonasigacha kuzatib bordi.

Tezkor harakatlar tufayli qizaloq o‘z vaqtida tibbiy yordam oldi. Keyinchalik uning otasi YPX xodimlariga professional yondashuvi, insonparvarligi va ko‘rsatgan yordami uchun minnatdorlik bildirdi.