“Tirik kitob” jarimaga tortildi, kitoblari musodara qilindi

Ijtimoiy tarmoqlarda “tirik kitob” nomi bilan tanilgan ko‘chada kitob sotuvchi Xayrulla Asadov noqonuniy tadbirkorlik faoliyati bilan shug‘ullangani uchun ma’muriy javobgarlikka tortildi.
Sud hujjatlariga ko‘ra, 2025-yil 23-sentabr kuni o‘tkazilgan tekshiruvda u 20 ming so‘mlik savdo uchun xarid cheki bermagani, tushumni onlayn nazorat-kassa mashinasiga kiritmagani va davlat ro‘yxatidan o‘tmasdan faoliyat yuritgani aniqlangan.
2026-yil 6-yanvardagi sud qarori bilan unga BHMning 5 baravari — 2 mln 60 ming so‘m miqdorida jarima belgilandi. Shuningdek, umumiy qiymati 1 mln 520 ming so‘mlik 100 dona kitob musodara qilindi.
Toshkent shahar sudlari kitob ma’naviyat vositasi bo‘lsa-da, savdoda u tovar hisoblanishi va sotuvchi qonuniy tartiblarga rioya qilishi shart ekanini ta’kidladi.