Afg‘onistonda 2,4 million qiz ta’lim olish imkonidan mahrum qilingan

Afg‘onistonda 2,4 millionga yaqin qiz o‘rta maktabda ta’lim olish imkonidan mahrum. YUNESKO “Tolibon” ma’muriyatini ayollar va qizlarga qo‘yilgan cheklovlarni bekor qilishga chaqirdi.
Ma’lumotlarga ko‘ra, 2025-yilga nisbatan o‘rta ta’limdan mahrum qizlar soni 200 ming nafarga oshgan. Cheklovlar saqlanib qolsa, 2030-yilga borib bu ko‘rsatkich qariyb 4 millionga yetishi mumkin.
“Tolibon” 2022-yilda qizlarning o‘rta maktab va ayollarning universitetlarda ta’lim olishini taqiqlagan. Shuningdek, ayollarga boshqa qator cheklovlar ham joriy etilgan. Jumladan:

▪️ayollarning BMT idoralarida ishlashi;
▪️erkaklarning ayollar uchun kiyim tikishi;
▪️ayollarning erkak shifokorlarga murojaat qilishi;
▪️ayollarning shifoxonaga yolg‘iz borishi;
▪️ayollarning istirohat bog‘lariga borishi;
▪️ayollar va oilalarning bog‘i yoki yashil hududi bo‘lgan ayrim restoranlarga kirishi;
▪️ayollar ovozi eshitiladigan reklamalarni efirga uzatish;
▪️ayollarning burqasiz davlat idoralariga kirishi;
▪️ayollarning sotuvchilar bilan savdolashishi;
▪️ayollarning o‘g‘il bolalarga dars berishi.

YUNESKO ma’lumotiga ko‘ra, ayol o‘qituvchilarga qo‘yilgan cheklovlar sabab 2030-yilga borib Afg‘onistonda 11 mingdan ortiq malakali ayol o‘qituvchi yetishmasligi mumkin.

#casia #news #Afganistan #YUNESKO