Prezident Toshkent shahar IIBB boshlig‘i va prokuroriga hayfsan berdi

Shavkat Mirziyoyev 27-yanvar kuni xavfsiz muhit va jamoat tartibini ta’minlash bo‘yicha yig‘ilishda Toshkent shahar IIBB boshlig‘i Ravshan Sultonxo‘jayev va prokuror Anvar O‘rmonovga hayfsan berdi hamda ularga olti oylik sinov muddati belgilandi.
Davlat rahbari poytaxtdagi ichki ishlar tizimi faoliyatida sifat yetishmasligini tanqid qilib, 2025-yilda 833 jinoyat holati hisobdan yashirilgani, jinoyatchilik ko‘pligi va mahallalar xavfsizligining past darajada ekanini qayd etdi. Ayrim tumanlarda oilaviy zo‘ravonlik, talonchilik va qotillik holatlari ko‘p kuzatilgan.
Shuningdek, kiberjinoyatchilikka qarshi kurash ishlari ham samarasiz ekani, 2025-yilda 16 ming kiberjinoyat ro‘y bergani va fuqarolarga 2 trillion so‘m zarar yetgani tanqid qilindi. Prezident mas’ullardan bank va to‘lov tizimlarida himoya tizimlarini tezroq joriy etishni talab qildi.
Mirziyoyev huquq-tartibot idoralari rahbarlarini, shu jumladan ichki ishlar, prokuratura, departament, xavfsizlik, gvardiya, sud, adliya, bojxona va soliq organlari rahbarlarini namuna bo‘lmayotganlikda aybladi. Shahar hokimliklari va mahalla tizimi bilan hamjihat ishlash orqali jinoyatlarning oldini olish imkoniyati yetarli bo‘lishiga qaramay, natija bo‘lmaganligi ta’kidlandi.