Chilidagi cho‘l kuchli yomg‘irdan so‘ng gullarga burkandi

Chilidagi Atakama cho‘lining katta qismi kuchli yomg‘irdan so‘ng rang-barang gullarga burkandi. Bu dunyodagi eng quruq qutbsiz cho‘llardan birida yuz bergan noyob tabiiy hodisa hisoblanadi.
Yil boshida El-Nino ob-havo hodisasi ta’sirida hududda kuchli yog‘ingarchilik kuzatilgan. Natijada tuproq ostida yillar, hatto o‘nlab yillar davomida faol bo‘lmagan millionlab urug‘ va piyozchalar unib chiqdi.
CONAF ma’lumotiga ko‘ra, cho‘lda 200 dan ortiq o‘simlik turi gullagan. Gullagan hududning maydoni taxminan 17 ming kvadrat kilometrni tashkil etgan.
Iyul va avgust oylarida ayrim hududlarda 160–190 millimetrgacha yomg‘ir yog‘gan. Mutaxassislar bu hodisani 1997-yildan beri Atakamadagi eng keng va jadal gullash mavsumi deb baholamoqda.
Gullagan cho‘l sayyohlarning ham e’tiborini tortgan. Tabiiy hodisa noyabr oyigacha davom etishi va shu davrda hududga qariyb 300 mingta sayyohlik tashrifi amalga oshirilishi kutilmoqda.