“U yaxshi niyatining qurboni bo‘ldi” — Turkiyada vahshiylarcha o‘ldirilgan Durdona Xakimova ishi

Istanbulda 37 yoshli o‘zbekistonlik Durdona Xakimovaning dahshatli o‘limi barchani larzaga soldi. Uning jasadi Shishli tumanida chiqindi qutisidan bo‘laklangan holda topildi. Tergovga ko‘ra, asosiy gumonlanuvchi uni pichoq bilan o‘ldirib, jasadni yashirishga uringan. Yana ikki shaxs ish bo‘yicha tekshiruv ostida. Gumonlanuvchi jinoyatini “ishqiy munosabat va xiyonat” bilan oqlashga uringan. Biroq marhumaning 7 yillik hamkori Murat Baskan bu da’volarni rad etdi. Uning aytishicha, gumonlanuvchilar Durdonaning sevgilisi emas, balki u insoniylik yuzasidan yordam bergan yurtdoshlari bo‘lgan.
Hodisa Istanbul va Anqarada norozilik namoyishlariga sabab bo‘ldi. Ayollar migrant ayollar xavfsizligini ta’minlash va aybdorlarni qat’iy jazolashni talab qildi. O‘zbekistonning Turkiyadagi diplomatik vakolatxonasi ishni nazoratga olganini bildirdi. Turkiya qonunchiligiga ko‘ra, qasddan odam o‘ldirish uchun umrbod qamoq jazosi belgilangan.