O‘zbekistonda aholi va qishloq xo‘jaligini ro‘yxatga olish boshlandi

15-yanvardan O‘zbekistonda aholi va qishloq xo‘jaligini ro‘yxatga olish jarayoni boshlandi va u 28-fevralga qadar davom etadi.

Fuqarolar 31-yanvargacha census.stat.uz platformasi orqali OneID tizimi yordamida onlayn ro‘yxatdan o‘tishlari mumkin. 4–28-fevral kunlari esa maxsus tayyorgarlikdan o‘tgan xodimlar uyma-uy yurib, aholi hamda qishloq xo‘jaligiga oid ma’lumotlarni to‘playdi.

Ro‘yxatga olish davomida aholining yoshi, ta’lim darajasi, bandligi, migratsiya holati, shuningdek, qishloq xo‘jaligida yer va chorvachilik bo‘yicha asosiy ko‘rsatkichlar qayd etiladi. Mutasaddilar barcha ma’lumotlar maxfiy saqlanishini va faqat statistik maqsadlarda foydalanilishini ta’kidladi.

Mazkur aholini ro‘yxatga olish mustaqil O‘zbekiston tarixida ilk bor o‘tkazilmoqda.