Masjidlarga imomlik qilgan Odilxon qori qamoqqa olindi

Toshkent shahridagi bir nechta masjidda imomlik qilgan va “Rayxon oilaviy milliy taomlari” ta’sischisi bo‘lgan Odilxon qori Ismoilovga nisbatan ikki jinoyat ishi bo‘yicha ehtiyot chorasi sifatida qamoqqa olish qo‘llanildi. U birinchi ish bo‘yicha talon-toroj qilish, soxta tadbirkorlik, mansab soxtakorligi, hujjatlarni qalbakilashtirish kabi jinoyatlarda gumon qilinmoqda. Ikkinchi ish doirasida esa Odilxon qori va yana 5 kishi iqtisodiy jinoyatlar, soliq to‘lovlaridan bo‘yin tovlash va hujjatlarni qalbakilashtirish bilan ayblanmoqda.
Sud qaroriga ko‘ra, Odilxon qori va yana 4 kishi qamoqqa olingan, 1 kishi esa garovga qo‘yilgan. Jinoyat ishlari 2025-yildan beri Pop tuman sudida ko‘rib kelinmoqda, navbatdagi sud majlisi 28-yanvarga belgilangan.

Odilxon qori 1977-yilda Namanganda tug‘ilgan va Toshkentdagi bir nechta masjidlarda imom xatib bo‘lgan, shuningdek, “Vaqf” xayriya jamoat fondida rahbari o‘rinbosari lavozimida ishlagan.