Miss Grand International sahnasida chalkashlik: davlat nomini yanglish eshitgan ishtirokchi o‘zini g‘olib deb o‘yladi

Miss Grand International 2025 go‘zallik tanlovida noodatiy holat ro‘y berdi. Panamalik ishtirokchi Isamar Errera g‘olib nomi e’lon qilinayotgan paytda mamlakati nomini yanglish eshitib, o‘zini finalga chiqqan deb o‘yladi.

Sahnada ismlar e’lon qilinganda, u quvonchdan baqirib yuborib, sahnaga chiqdi, qo‘llarini yuqoriga ko‘tardi va tomoshabinlarga tabassum bilan imo qildi. Biroq oradan bir necha soniya o‘tib, uning quvonchi kutilmaganda noqulay holatga aylandi — aslida g‘olib deb Paragvay vakilasi Sesiliya Romero e’lon qilingan edi.

Isamar bir lahzaga nima bo‘layotganini anglamay, hayron bo‘lib qoldi. Shundan so‘ng u sahnadan muloyimlik bilan chetga chiqdi va g‘olibni olqishladi. Tomoshabinlar va ijtimoiy tarmoqlardagi foydalanuvchilar bu lahzani “eng noqulay, ammo samimiy adashish” deb atashdi.

Bu video qisqa vaqt ichida millionlab ko‘rishlarga ega bo‘lib, ko‘pchilik foydalanuvchilar Isamarning samimiy reaksiyasini ijobiy baholashdi. Ba’zilar esa bu holat go‘zallik tanlovlari bosimidagi insoniy omilni yana bir bor eslatganini yozishdi.