Mirziyoyev Pokiston Mudofaa kuchlari Oliy bosh qoʻmondoni bilan uchrashdi

Oʻzbekiston Prezidenti Shavkat Mirziyoyev Islomobodga kelganidan soʻng “Global sanoat va mudofaa yechimlari” kompaniyasiga tashrif buyurib, Qurolli Kuchlarning quruqlikdagi qoʻshinlari qoʻmondoni feldmarshal Asim Munir bilan uchrashuv oʻtkazdi. Uchrashuvda Oʻzbekiston va Pokiston oʻrtasidagi strategik sheriklik, harbiy va harbiy-texnik sohalarda hamkorlik, xavfsizlik tahdidlariga qarshi kurash, harbiy mutaxassislarni tayyorlash, tajriba almashish va qoʻshma oʻquv tadbirlari muhokama qilindi. Shuningdek, transport va logistika sohasida infratuzilmaviy loyihalarni jadallashtirish va harbiy hamkorlik boʻyicha “yoʻl xaritasi” tayyorlash masalalarida kelishuvga erishildi. Prezident kompaniya ishlanmalari va Pokistonning zamonaviy harbiy texnikasi bilan tanishdi.