Yamaykada asrning eng kuchli bo‘roni “Melissa” yopirildi

Birlashgan Millatlar Tashkilotining Jahon meteorologiya tashkiloti ma’lum qilishicha, Yamaykaga 300 km/soat tezlikdagi shamol bilan “Melissa” nomli to‘fon yopirilgan. Mutaxassislar bu hodisani orol tarixidagi eng kuchli dovul sifatida baholamoqda.

Bo‘ron orol bo‘ylab kuchli yomg‘ir, 4 metrgacha ko‘tarilayotgan okean to‘lqinlari va suv toshqinlarini keltirib chiqarmoqda. Natijada infratuzilma jiddiy zarar ko‘rgan — ko‘plab yo‘llar, ko‘priklar va elektr uzatish tarmoqlari ishdan chiqqan. So‘nggi ma’lumotlarga ko‘ra, 1,5 millionga yaqin aholi xavf ostida qolmoqda.

Yamayka hukumati favqulodda holat e’lon qildi va 800 dan ortiq vaqtinchalik boshpana tayyorlagan. Biroq mahalliy OAV xabariga ko‘ra, ko‘plab fuqarolar o‘z uylarini tark etmayapti, bu esa qutqaruv ishlarini yanada murakkablashtirmoqda.

Bosh vazir Endryu Xolness aholiga murojaat qilib, iloji boricha tezroq xavfsiz joylarga ko‘chishni va hukumat ko‘rsatmalariga qat’iy amal qilishni tavsiya qildi.

Mutaxassislar esa Karib dengizida so‘nggi yillarda kuzatilayotgan bunday kuchli to‘fonlar soni global iqlim o‘zgarishi bilan bevosita bog‘liq ekanini ta’kidlashmoqda. Dengiz harorati ortgani sari shamol tezligi va yog‘in miqdori yanada kuchayib, bo‘ronlar miqyosi kengaymoqda.