Mali va Burkina-Faso AQSH fuqarolariga mamlakatga kirishni taqiqladi

G‘arbiy Afrikaning ikki davlati — Mali va Burkina-Faso AQSH fuqarolarining o‘z hududiga kirishini taqiqladi. Qaror 30-dekabr kuni qabul qilingan bo‘lib, bu AQSH prezidenti Donald Tramp tomonidan ushbu davlatlar fuqarolari uchun joriy etilgan viza cheklovlariga javob sifatida baholanmoqda. Bu haqda The Guardian nashri xabar berdi. “O‘zaro tenglik” tamoyili asos bo‘ldi Mali Tashqi ishlar vazirligi bayonotida aytilishicha, qaror “o‘zaro tenglik” tamoyiliga asoslangan. Ya’ni, AQSHda maliliklar duch kelayotgan talab va cheklovlar endilikda AQSH fuqarolariga ham tatbiq etiladi. Burkina-Faso Tashqi ishlar vaziri Karamoko Jan-Mari Traore ham shunga o‘xshash mazmundagi hujjatni imzolab, amerikaliklarning mamlakatga kirishi rasman taqiqlanganini tasdiqladi. Tramp viza cheklovlarini kengaytirdi Donald Tramp 16-dekabr kuni viza cheklovlari ro‘yxatini yana 20 ta davlatga, jumladan Mali, Burkina-Faso va Nigerga nisbatan ham kengaytirgan edi. Ushbu mamlakatlar hozirda harbiy xuntalar tomonidan boshqarilmoqda va G‘arbiy Afrika davlatlari iqtisodiy hamjamiyatidan chiqib ketgan. Oq uy mazkur cheklovlarni quyidagi sabablar bilan izohlagan: mintaqada qurolli guruhlar faolligining keskin oshgani; 26-noyabr kuni Vashingtonda ikki nafar Milliy gvardiya xodimining o‘ldirilishi; AQSHga kirishni istagan shaxslar haqidagi ma’lumotlarning yetarli emasligi va bu milliy xavfsizlikka tahdid solishi. Mintaqadagi siyosiy taranglik kuchaymoqda Mali va Burkina-Faso uzoq yillardan buyon qurolli guruhlar bilan kurashib kelmoqda. Har ikki davlatda ham harbiylar xavfsizlikni ta’minlay olmagan fuqarolik hukumatlarini ag‘darib, hokimiyatni egallagan. Ekspertlar fikricha, AQSH bilan yuzaga kelgan ushbu “viza qarama-qarshiligi” mintaqadagi siyosiy va diplomatik taranglikni yanada kuchaytirishi mumkin. Ma’lumot o‘rnida, bundan avval Niger hukumati ham AQSH fuqarolariga viza berishni to‘xtatgan edi. Bu qaror AQSH Nigerga nisbatan viza tartibini o‘zgartirib, uni maxsus cheklovlar ro‘yxatiga kiritganidan so‘ng qabul qilingan.