Qirg‘izistonda mast holda mashina boshqargan ta’lim vaziri ishdan olindi

Qirg‘iziston prezidenti Sadir Japarov fan, oliy ta’lim va innovatsiyalar vaziri Baxtiyar Orozovni davlat xizmatchilari etikasi talablarini buzgani uchun lavozimidan ozod etdi. Tegishli farmon 15-dekabr kuni imzolangan. Orozov Chuy viloyatida mast holda avtomobil boshqarganlikda gumonlanib YHXB xodimlari tomonidan to‘xtatilgan. Tibbiy ko‘rik uning organizmida alkogol borligini tasdiqlagan. Orozov pivo ichganini tan olgan. U 2025-yil may oyida vazir etib tayinlangan edi.