Britaniya qiroli ukasi shahzoda Endryuni unvonlardan mahrum qildi

Buyuk Britaniya qiroli Charlz III o‘zining ukasi, shahzoda Endryuni barcha qirollik unvonlari, harbiy darajalari va rasmiy imtiyozlaridan mahrum qildi. Bu qaror shahzodaning jinsiy zo‘ravonlikda ayblanishi va voyaga yetmaganlarni ekspluatatsiya qilgan amerikalik moliyachi Jeffri Epshteyn bilan aloqadorligi haqidagi jiddiy mojarodan so‘ng qabul qilindi.

Britaniya OAV xabarlariga ko‘ra, qirol ushbu qarorni uzoq muhokamalardan so‘ng, maslahatchilar va qirollik oilasi a’zolari bilan kelishgan holda qabul qilgan. Endryu endi nafaqat unvonlardan, balki davlat mablag‘laridan ham mahrum bo‘ldi hamda Royal Lodge qarorgohini tark etish haqida ogohlantirildi.

Shahzoda Endryu o‘ziga qo‘yilgan ayblovlarni rad etgan bo‘lsa-da, voqea Britaniya monarxiyasining obro‘siga jiddiy putur yetkazdi. Charlz III ning qarori qirollik obro‘sini saqlab qolish va “qonun oldida hamma teng” degan tamoyilni namoyon etish uchun tashlangan qat’iy qadam sifatida baholanmoqda.