Hormuz bo‘g‘ozi yopildi: Eron va AQSH sulhi buziladimi?

Eron AQSHni sulh kelishuvini buzganlikda ayblab, strategik ahamiyatga ega bo‘lgan Hormuz bo‘g‘ozini yopganini ma’lum qildi. Tehron bu qarorni AQSH tomonidan Livan hududiga berilgan zarbalar bilan izohladi.

Ma’lumotlarga ko‘ra, avval AQSH va Eron o‘rtasida qisqa muddatli sulh e’lon qilingan edi. Kelishuvga binoan, mintaqadagi keskinlik pasayishi va dengiz yo‘llari, xususan, Hormuz orqali kemalar harakati tiklanishi kerak bo‘lgan.
Biroq Eron tomoni AQSHning Livandagi ayrim nishonlarga zarba berganini sulh shartlarining buzilishi sifatida baholadi va bu zarbalar Eronni qo‘llab-quvvatlaydigan guruhlar faoliyatiga qarshi yo‘naltirilgan.

Shundan so‘ng Tehron javob chorasi sifatida Hormuz bo‘g‘ozini yopganini e’lon qildi. Mazkur hudud orqali neftning katta qismi o‘tadi, shu sabab bu qaror global energetika bozorlariga jiddiy ta’sir ko‘rsatishi mumkin. Tramp agar Eron sulh shartlariga rioya qilmasa, aviahujumlar yana tiklanishini ma’lum qildi.

Shu bilan birga Livandagi vaziyat ham keskinlashib borayotgani qayd etilmoqda. Isroil 8-aprel kuni Bayrut markazidagi aholi zich yashaydigan savdo va turar joy hududlariga ogohlantirishsiz zarba berdi. Oqibatda 250 dan ortiq odam halok bo‘ldi.
AQSH va Eron ikki haftalik sulhga kelishgan bo‘lsa-da, Netanyaxu bu sulh Livanga taalluqli emasligini aytib, hujumlar davom etishini ma’lum qilgan.