Venesuelada portlashlar: poytaxtning ayrim hududlarida elektr o‘chdi

Bugun, 3-yanvar kuni Venesuela poytaxti Karakasda ketma-ket portlashlar sodir bo‘ldi. Guvohlarning aytishicha, shaharning janubiy qismida, yirik harbiy baza joylashgan hududda kamida yettita portlash ovozi eshitilgan. Oqibatda bir qator tumanlarda elektr ta’minoti uzilgan.
Mahalliy aholining xabar berishicha, portlashlar bilan bir vaqtda shahar uzra samolyotlar uchib o‘tgan, ayrim joylarda esa o‘q tovushlari eshitilgan. Ijtimoiy tarmoqlarda AQSH harbiy vertolyotlari Karakas osmonida uchayotgani aks etgan videolar tarqalmoqda. Tasdiqlanmagan xabarlarga ko‘ra, AQSH hujumkor vertolyotlari Venesuela quruqlik nishonlariga zarba bera boshlagan. 
Venesuela hukumati ma’lum qilishicha, Prezident Nikolas Maduro barcha milliy mudofaa rejalarini to‘liq shay holatga keltirishni buyurgan. Bayonotda ular zarur vaqtda hamda tegishli sharoitlarda ishga tushirilishi ta’kidlangan.