Firibgarlikka uchragan onlayn kreditlar bo‘yicha qarz undirish jarayoni to‘xtatiladi

Yangi nizomga ko‘ra, onlayn kreditlarda firibgarlik (frod) holati aniqlanganda fuqarolardan qarz undirish to‘xtatiladi. Agar kredit tashkiloti frod natijasida rasmiylashtirilgan kredit bo‘yicha fuqaro surishtiruvchi, tergovchi, prokuror qarori yoki sud ajrimi bilan jabrlanuvchi deb e’tirof etilsa, ushbu kredit va unga bog‘liq foizlarni hisoblash hamda undirish amalga oshirilmaydi.
Kredit tashkiloti frod holatini sodir etgan shaxsdan yetkazilgan moddiy zararini regres tartibida undirishi mumkin. Agar surishtiruv yoki sud qaroriga ko‘ra frod holati yuz bermaganligi aniqlansa, kredit va foizlarni undirish davom ettiriladi.
Shuningdek, O‘zbekiston bank va to‘lov ilovalari foydalanuvchilari faqat o‘zlariga yoki yaqin qarindoshlariga tegishli kartalar va hisoblarni mobil ilovaga ulashlari mumkin. Boshqa shaxslarning kartalaridan foydalanish taqiqlanadi. Ro‘yxatdan o‘tishda telefon raqami va PINFL tekshiriladi, biometrik identifikatsiya majburiy, va SMS-kod uch martadan ko‘p xato kiritilsa, ilovadagi barcha operatsiyalar 15 daqiqa bloklanadi. Boshqa qurilmadan kirishda yoki parolni tiklashda kartalar va tranzaksiyalar tarixi o‘chiriladi, qayta ulash faqat biometrik tekshiruvdan so‘ng mumkin. Bu chora-tadbirlar, xususan Yangi Bankning tugatilishi va firibgarlik hujumlari fonida, fuqarolarning mablag‘larini himoya qilish maqsadida joriy etildi.