Toshkentdagi Muqaddas Iso Qalbi soborida Rojdestvo ibodatlari o‘tkazildi

24-dekabr kuni kechqurun Toshkentdagi Rim-katolik Muqaddas Iso Qalbi soborida Rojdestvo munosabati bilan tantanali ibodatlar bo‘lib o‘tdi. Shu kuni ikki marotaba — soat 20:00 da rus tilida va 22:00 da ingliz tilida xizmat o‘tkazildi. Har ikkala marosimga Toshkent apostol ma’muriyati episkopi Yeji Matsulevich boshchilik qildi. Xavfsizlikni Milliy gvardiya xodimlari ta’minladi, tez yordam mashinasi ham navbatchilik qildi. Shunga qaramay, muhit ochiq va osoyishta bo‘lib, soborga nafaqat katoliklar, balki boshqa konfessiya vakillari ham tashrif buyurdi. Xizmatlar oralig‘ida sobor xori Rojdestvo qo‘shiqlarini ijro etdi. Ibodatlardan so‘ng barcha istaganlar episkopdan baraka olish imkoniga ega bo‘lishdi. Katoliklarda Rojdestvoga tayyorgarlik to‘rt hafta oldin — Advent davrida boshlanadi. Bu paytda mo‘minlar ro‘za tutib, Injildan parcha o‘qiydi va o‘zlarini tiyishga chaqiriladi. Ro‘za ovqat bilan cheklanmaydi: inson o‘zi muhim deb bilgan odatidan — masalan, shirinlik, qahva yoki ijtimoiy tarmoqlardan voz kechishi mumkin. An’anaga ko‘ra, Rojdestvo arafasida katoliklar oilaviy dasturxon atrofida jam bo‘lishadi. Unda 12 ta ro‘za taomi va asosiy baliqli taom bo‘ladi hamda maxsus oq non — «oplatka» bo‘linib, bir-biriga tinchlik va baraka tilanadi. Episkopning so‘zlariga ko‘ra, Santa Klaus obrazi nasroniy avliyosi — Muqaddas Nikolay bilan bog‘liq bo‘lib, u muhtojlarga yashirincha yordam bergani bilan tanilgan. An’anaviy sovg‘alar ham aynan 6-dekabr — Muqaddas Nikolay kuni beriladi.