G‘azoda o‘quvchilar uch yildan so‘ng an’anaviy ta’limga qaytdi

G‘azo sektorida yuz minglab o‘quvchilar uch yillik tanaffusdan so‘ng 19-sentabr kuni an’anaviy ta’limga qaytdi. Biroq darslar asosan urushda zarar ko‘rgan binolar va vaqtincha qurilgan chodirlarda o‘tkazilmoqda.
UNICEF ma’lumotlariga ko‘ra, urush davomida G‘azodagi maktablarning 98 foizi zarar ko‘rgan yoki vayron bo‘lgan. Ta’lim rasmiylari 660 mingga yaqin o‘quvchi maktabdagi ta’limdan mahrum bo‘lganini bildirdi.
Yangi o‘quv yili xalqaro va mahalliy tashkilotlar ko‘magida boshlandi. O‘quvchilar uchun chodir, brezent, tunuka va yog‘ochdan vaqtinchalik maktablar tashkil etilgan.
Ko‘plab oilalar daftar, ruchka va maktab kiyimlarini sotib olishga qiynalayotgani sabab ayrim o‘quvchilar zarur o‘quv qurollarisiz darsga kelmoqda.
Ta’lim rasmiylariga ko‘ra, UNICEF ko‘magida 2026-yilda kamida 540 ming o‘quvchini vaqtinchalik ta’lim punktlarida oflayn o‘qitish rejalashtirilgan. Darslarga qatnasha olmaydigan o‘quvchilar uchun onlayn ta’lim ham davom ettiriladi.