Irina Sheyk qizini tarbiyalashdagi cheklovlar haqida gapirdi

Rossiyalik supermodel Irina Sheyk shaxsiy hayoti va farzand tarbiyasi haqida odatda juda kam gapiradi. Yaqinda u People nashriga bergan intervyusida qizi Leya qanday tarbiyalanayotgani va uning hayotida qanday cheklovlar mavjudligi haqida so‘zlab berdi.

Irina Sheykning qizi Leya 2017-yil mart oyida amerikalik aktyor Bredli Kuperdan dunyoga kelgan. Mashhur ota-onalar qizini ommaning ortiqcha e’tiboridan maksimal darajada himoya qilishga harakat qilgan. Hozir Leya 8 yoshda. Sheykning aytishicha, endi qiz ota-onasining mashhurligini, ularning ishlari va hayot tarzi bilan tanishib bormoqda. Shunga qaramay, model va Kuper qizining qulayligi va xavfsizligini ta’minlash uchun barcha choralarni ko‘rishadi.

Tarbiya prinsiplari haqida gapirar ekan, Irina Sheyk gadjetlardan foydalanishga qat’iy cheklovlar qo‘yilganini ochib berdi:

“Uning raqamli texnologiyalarga kirishi juda, juda cheklangan. Deyarli yo‘q,” — deya People xabar beradi.

Buning o‘rniga ota-onasi qizini do‘stlar bilan muloqot, o‘yin va jonli aloqalar orqali rivojlantirishga intiladi. Ularning fikricha, qiz uchun eng muhim narsa — mehr va oilaviy iliqlik.

“Farzandingizga bera oladigan eng yaxshi narsa — mehr qo‘yilgan oilaviy tarbiya,” — deydi Irina Sheyk.

Bredli Kuper va Irina Sheykning munosabatlari ilk bor 2015-yilda ommaga ma’lum bo‘lgan. Ular rasmiy nikohda bo‘lmagan va 2019-yilda munosabatlari yakunlangan.