- 8
- 16.10.2026 14:10:00
- 1 min read
AQSH federal sudyasi Tramp ma’muriyatiga 2027-yilgi grin-karta lotereyasi uchun ro‘yxatdan o‘tishni ochishni buyurdi. Qaror Davlat departamenti lotereya uchun arizalarni belgilangan vaqtda qabul qilishni boshlamagani sababli chiqarildi.
Sudya Jinsuk Ohta Davlat departamentiga ro‘yxatdan o‘tish muddatini e’lon qilish va arizalarni elektron shaklda qabul qilish uchun kamida 30 kun vaqt ajratish haqida ko‘rsatma berdi.
Dastur orqali AQSHga immigratsiya darajasi past bo‘lgan mamlakatlar fuqarolariga 55 mingtagacha viza ajratiladi. Biroq lotereyada tanlanish AQSHga borish yoki grin-karta olishni avtomatik ravishda kafolatlamaydi. G‘oliblar viza olish uchun belgilangan talablarga javob berishi kerak.
Sud qaroriga ko‘ra, Davlat departamenti tanlangan arizachilarning hujjatlarini mavjud vizalar tugaguncha yoki 2027-moliya yili yakunlanguncha ko‘rib chiqishi lozim.
Grin-karta lotereyasi AQSH Kongressi tomonidan 1990-yilda tashkil etilgan. 2027-yilgi dastur uchun ro‘yxatdan o‘tish sanalari va ariza topshirish tartibini Davlat departamentining rasmiy e’lonlari orqali kuzatish kerak.
