AQSH immigratsiya reydlarida elektroshokli qo‘lqoplardan foydalanilishi mumkin

AQSHning federal immigratsiya agentlari elektr toki beruvchi maxsus qo‘lqoplar bilan jihozlanishi mumkin.
Ichki xavfsizlik departamenti 2027-yil martigacha 10–20 million dollar ajratib, CT-G5 G.L.O.V.E. nomli qo‘lqoplarni xarid qilishni rejalashtirmoqda. Qurilma odamga tekkizilganda elektr impulsi beradi va qarshilik ko‘rsatayotgan shaxsni nazorat qilishga yordam berishi kerak. Departament qo‘lqoplardan vaziyatni yumshatish va e’tiborni chalg‘itish uchun foydalanishni rejalashtirgan.
Biroq tashabbus huquq faollari va ayrim huquq-tartibot xodimlarining noroziligiga sabab bo‘lmoqda. Ular qurilmalar muhojirlar va namoyishchilarga nisbatan haddan tashqari kuch bilan qo‘llanishidan xavotirda.
Ishlab chiqaruvchi kompaniya esa qo‘lqoplarni bolalar, homilador ayollar, keksalar va og‘ir nogironligi bo‘lgan shaxslarga qo‘llamaslikni tavsiya qiladi.