Kichkina “shtraf” bilan qutulib qolgan “tyuning”chiga berilgan jazo qayta ko‘rib chiqiladigan bo‘ldi

Bosh prokuratura Toshkentda qoidabuzarligi bilan faxrlanishini aytgan BMW ishqibozi, Uzbelas Performance rahbari Asadbek Jumayevga berilgan jazo yuzasidan sudga protest kiritilganini e’lon qildi.

Videointervyu o‘rganilganidan so‘ng aniqlanishicha, Jumayev 2026-yil 16-yanvarda Mirzo Ulug‘bek tumani sudining qaroriga ko‘ra, Ma’muriy javobgarlik to‘g‘risidagi kodeksning 195-2-moddasi bo‘yicha 8,2 mln so‘m jarimaga tortilgan. Jumayev aytgan “10 ta minimalka” bor-yo‘g‘i maqtanchoqlik va piar maqsadida aytilganini, shuningdek intervyu kontekstdan chiqarilganini ta’kidlab, uzr so‘radi.

Hodisa va intervyu keng jamoatchilik noroziligiga sabab bo‘ldi: ekspertlar qonun hamma uchun teng bo‘lishi, tanish-bilish omili orqali yengil jazo berilmasligi zarurligini ta’kidlashdi. Shu fonida Adliya vazirligi noqonuniy poygalar va huquqbuzarliklarni tartibga soluvchi qonun loyihasini ishlab chiqmoqda.