Xitoy Vyetnam bilan chegaraga odamsimon robotlar joylashtiradi

Xitoyning UBTech Robotics kompaniyasi Vyetnam bilan chegaradosh Guansi avtonom rayonidagi nazorat punktlariga odamsimon Walker S2 robotlarini o‘rnatish bo‘yicha 264 million yuanlik (taxminan 37 mln dollar) shartnoma imzoladi. 
Walker S2 – akkumulyatorini mustaqil ravishda uch daqiqada almashtira oladigan dunyodagi birinchi odamsimon robot. U 162 sm bo‘yga, 43 kg og‘irlikka ega va 2–4 soat ishlay oladigan batareyalar tizimi bilan jihozlangan. Loyiha doirasida robotlar Fanchengan shahridagi chegara punktlarida xizmat qiladi: sayyohlarga yo‘l ko‘rsatadi, oqimni tartibga soladi, patrullik qiladi va logistika vazifalarini bajaradi. UBTech yil oxirigacha 500 ta robot yetkazib berishni, kelgusi yili ishlab chiqarishni o‘n baravar oshirishni va 2027-yilda yiliga 10 ming dona robot ishlab chiqarishni rejalashtirgan.

Xitoyda robototexnika keng sohalarda jadal joriy etilmoqda: tibbiyot, qariyalar parvarishi, jamoat xavfsizligi, shahar tozaligi va logistika. Chegara nazorati esa sun’iy intellekt asosidagi yangi yo‘nalishlardan biriga aylanmoqda.